الوعى

الوعى 

أهم مشكلة حصلت فى تاريخ البشرية كانت غياب الوعى وهى السبب الرئيسى فى كل ما حدث للبشرية من فشل واخفاقات ،

يعنى ايه وعى بقى ؟ الوعى هو المعرفة الحقيقية

بدأت ازاى المشكلة ؟
مشكلة غياب الوعى أو بمعنى آخر (تسطيح الشعب) بدأت مع عبادة الأصنام .. ايوا بدأت فى عهد سيدنا نوح لما الناس صنعوا تماثيل لـ"عباد الله الصالحين" اللى كانوا فى عصرهم عشان كل ما يشوفوا التماثيل دى يفتكروا حسن عبادتهم وعلمهم .. ومع مرور الوقت وبغياب العلم الحقيقى اخترع بعض الناس حجة لوجود التماثيل دى وهى انها تعبد من دون الله وبالفعل عبدت وجاء سيدنا نوح بطوفان طهر الأرض من ذلك ..

هى المشكلة هنا فين ؟ المشكلة فى نقطتين أساسيتين .. الأولى ان العلماء الصالحين اللى كانوا عارفين الحلال والحرام محذروش الناس مما قد يحدث " غياب الرؤية الاستراتيجية للأفعال " والثانية ان الناس اللى بتحب تفتى بغير علم اتدخلوا كالمعتاد وفسروا وجود التماثيل واخترعوا بدعة الشرك بالله .. الشيطان مكانش محتاج أكتر من كدا (علماء نايمين فى العسل و شعب محب للفتوى بطبعه) عشان كدا بدءت الفطرة تنحرف والناس تعبد الأصنام حتى ابتلاهم الله بعذابه بعد رفضهم لرسالة نوح - عليه السلام - لذلك بنقول ان الوعى يصنعه العلماء وهو واجب عليهم .. وان كلمة لاأعلم بترحم الناس كلهم من مشاكل كبيرة هم فى غنى عنها ..


ولذلك انا حتى الآن مستغرب ان فى بعض الأصدقاء بيفسروا آيات القرآن والأحاديث والأحكام الشرعية بمزاجهم من غير سابق علم او بحث لمجرد بس انهم شافوا فلان الفلانى بيقول كدا ، سواءاً أكان فلان دا عالم شكله ملتزم شرعاً (واللى بيصدقوه معذورين شوية) أو شخص شكله متفذلك وبيهجص

مثال على مشكلة الوعى ، قرأت فى كتاب لواحد من اللى بيتفذلكوا تفسير بعض آيات القرآن بأسلوب زى الزفت وكان من أهم الخبل اللى قاله " آدم كانت معصيته الزنا مع حواء وليس هو أول بشرى بل انه نتيجة لتطور كائن آخر " وطبعاً انا مش فاهم ازاى سيدنا أدم يكون متزوج السيدة حواء وهيزنيا مش فاهم أنا بصراحة ..  وبعدين لما ربنا يقول "قال يا إبليس ما منعك أن تسجد لما خلقت بيدي"  يبقى ازاى مش هو أول بشرى !!

مثال تانى على مشكلة غياب الوعى ؛ خروج بعض الشباب بتفسيرات للقرآن متعارضة مع صحيح الدين فتلاقى واحد منهم ينفى عذاب القبر ونعيمه وينفى انشقاق القمر .. وواحد تانى يرد أحاديثاً صحيحة بسبب انها مش مقنعة عقلياً له رغم ان معلوماته العلمية اللى تمكنه من الحكم سواءاً على الشريعة او على الطبيعة تكاد تكون صفر وشوية كتب قراها ..

مصر مثال كبير ، الأزمة الحالية فى مصر واللى بيتحول الدين فيها تدريجياً الى عادة من عادات المصريين بحيث اننا بنلاقى فطار فى معبد يهودى ومسيحين بيفطروا مع مسلمين فى رمضان والصلاة عبارة عن حركات خالية من معانيها لدرجة اننا ممكن نوصل فى يوم نلقى المصريين يروحوا يحجوا فى الهرم بدل الكعبة بسبب عدائهم للفكر الوهابى اللى محدش فيهم يعرف عنه حاجة  ، أهو كله عك تلفزيونى والناس بتتبعه ولذلك أقدر أعتبر التلفزيون دا أكبر مطحنة للوعى الاسلامى والوعى العام فى العالم دلوقتى وانصح اى حد عنده تلفزيون يحوله حوض سمك

نصيحة ، اقرءوا عن دينكم ولا تتبعوا أحداً ، الكل له أخطائه .. افتحوا مكتبات العلماء المسلمين واهتموا بعلوم الشريعة لان الحياة مش فيزيا وطب وصيدلة وبس اقرءوا كتب الفقهاء والمحدثين وشوفوا الناس تعبوا أد ايه عشان تعرفوا دينكم حق المعرفة .. اقرءوا كتب الفكر الاسلامى وانقدوها ومش لازم كل حاجة تتقال تبقى صحيحة .. كونوا عقلاً ناقداً وقلباً طالباً للهداية يهديكم الله الى الحق ويؤتيكم من الطيبات يوم "‏يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ "