الفكر الاسلامى

الفكر الاسلامى 

ملاحظة كل اللى فى المقال دا من أفكارى الخاصة وملوش سند علمى لكنه ناتج عن تجربة ودراسة طويلة مش بالهجايص يعنى ..
الفكر عموماً هو نتاج عملية التفكير .. يعنى واحد قعد يتفكر فى حاجة معينة بكل جوانبها لحد ما أخرج فكره كامله عنها لذلك كان تعريفى للفكر الاسلامى انه هو (المبادئ الكلية الناتجة من استقراء عموم أحكام الشريعة الاسلامية)

يعنى ايه بردوا ؟ بص يافندم .. الشريعة الاسلامية دى عبارة عن (النسخة المحمدية لدين الاسلام) يعنى التوراة مثلاً كانت نسخة سيدنا موسى والانجيل كان نسخة سيدنا عيسى عليهم جميعاً الصلاة والسلام ولذلك المفروض اننا نبحث عن الشريعة فى القرآن والسنة وتطبيق الصحابة لها لانهم هم اول جيل اتخرج من المدرسة .. وبالمناسبة بعض الناس اعترضوا على كلمة "نسخة" أقصد شريعة النبى موسى وشريعة النبى عيسى وشريعة النبى محمد - صلى الله عليهم وسلم - وذلك لأن الدين واحد فقط هو الاسلام والشرائع تختلف

نيجى بقى نقسم علوم الشريعة دى اللى وصلت الينا ، هتلاقيها قسمين كبار (علوم الكيفيات وعلوم الغايات) علوم الكيفيات دى بتقولنا ازاى نؤمن بالشهادتين وازاى نصلى وازاى نحج الخ ودى نوعين كبار بردوا (علوم الأدلة وعلوم الأحكام) .. علوم الأدلة دى نوعين (علم الحديث وما يتعلق به زى المصطلح والرجال وعلم التفسير وما يتعلق به زى علوم القرآن واللغة)  خليك ماشى معايا فى الشجرة وارسم لو سمحت ... علوم الاحكام بقى دى جزئين جزء بيتكلم عن العقائد ودا اسمه علم العقيدة وجزء بيتكلم عن أحكام الفقه اللى هو علم الفقه ويتعلق بهما علوم أخرى زى علوم المنطق والحساب واللغة واصول الفقه الخ

علم الغايات بقى هو

بمعنى آخر فلسفة الشريعة .. يعنى ليه بنصلى وليه بنصوم وليه بنقول ان الله هو الواحد الأحد وليه بنؤمن بالآخرة والنعيم والعذاب ، والعلم دا هينتج منه شوية مبادئ عامة هتلاقيها موجودة فى كل غايات الأحكام يعنى كمثال هتلاقى ربنا حرم الخمر والزنا والربا والغيبة والنميمية كلها عشان "الحفاظ على أمن المجتمع وسلامته" يبقى نتج لنا مبدء عام هو ان الاسلام يرمى الى الحفاظ على أمن المجتمع  وسلامته .. المبدء دا بقى وامثاله بيشكلوا الفكر الاسلامى

ايوا يعنى استفدنا ايه من اللفة دى ؟

استفدنا كتير .. اننا مثلاً لو جينا نحاكم قضية جديدة مثلاً واتضح انها بتضر أمن المجتمع لكن بتجيب فلوس كتيرة جداً فمبادئنا الفكرية المفروض ترفضها .. وبنفس الطريقة كدا كان المفروض ان المجتمع المسلم يرفض الاشتراكية لانها بتقتل الملكية الخاصة ويرفض الرأسمالية البحتة لانها بتحول المجتمع الى صندوق زبالة وشوية محتكرين .. ليه بقى ؟؟ لان احد أهم مبادئ الدين الاسلامى المستفادة من عموم احكام الزكاة والصدقات والعتق والنفقات وبيت المال الخ الخ الخ هو ( احترام الملكية الخاصة ، و دفع الزكاة كاملة لمستحقيها بما يكفل التعاون المجتمعى ويضمن حرية التنافس ) ودا هيفيدنا ان شاء الله لما نبنى بيت او نبنى دولة هنعرف نمشى صح

طيب ليه بتقول المبادئ كلية الناتجة من استقراء عموم احكام الشريعة ؟؟

لان المفروض اننا نستخرج مبادئ عامة كلية مش ناخد حالة خاصة ونقول عليها احد مبادئ الشريعة .. بالمناسبة القاعدة دى تطبق أيضاً على مسائل العقيدة والالحاد ومسائل السياسة الشرعية ومسائل علم الاجتماع  .. وبالمناسبة هو دا سبب رفضنا لكل اللى حصل فى المجتمع المصرى من تحريف للدين

 أمثلة على طريقة استنباط الفكر وكل مثال من دول بمثابة موضوع أساسى من موضوعات العلم دا من خلال كتابات كل الناس اللى كتبوا فيه لكن مش هنقول تفاصيل

لا اله الا الله خالق كل شئ ، محمد رسول الله - صلى الله عليه وسلم - ..
مبدأ رئيسى فى حياة المسلم وهنا ستجد الملاحدة أكثروا الكتابة فى محاولة لنفى ذلك المبدأ لكن تصدى لهم علماء الفكر بالحجة . والسمعيات أو الأمور اللى لم نعرفها الا من القرآن والسنة زى الملائكة ازاى نفكر فيها وايه الاعتقاد الصحيح فيها وازاى ينعكس دا على حياتنا ؟

تاريخ البشرية وحضارتها ، وكون آدم هو أبوالبشر وأن الله خلقه بيده ، وتاريخ الأنبياء كما ورد فى القرآن ، وتاريخ أمة الاسلام فى عهد النبوة والخلفاء .. كل ما يمت الى هذه الأشياء وتحليلها والدروس المستفادة منها يصب فى بناء الفكر الاسلامى ..

الأخلاق والضمير .. وطبيعة العلاقة بين الفرد والمجتمع ومن ضمن المبادئ المندرجة تحت هذا البند ما ذكرناه فى المرة السابقة (الحفاظ على أمن المجتمع وسلامته من مبادئ الاسلام)

علاقة الاسلام بأصحاب الشرائع السماوية وأصحاب العبادات الأخرى ، هل نطبع مع الجميع ولا فى ناس نهينا عن انشاء علاقة معهم مثل " من يحاربوننا كالصهاينة " وهل نحارب المسالم ؟ وايه مدى العلاقة دى وايه بيحكمها

الدعوة الاسلامية أركانها ووسائلها الخ ..هل يجب علينا نشر الاسلام ؟ وعلى أى نطاق يجب ذلك ؟ وايه المبادئ المتبعة فيه ؟ .. المجتمع الاسلامى ايه خصائصه وازاى نكونه وايه المطلوب عشان ينشأ وايه علاقة دا بالخلافة أو دولة الاسلام ؟ …الدولة ما الذى يحدد أطرها وكيف تدار والسياسة وطرق الحكم ؟الجهاد والتسلح .. العلم والتقدم والنهضة .. وأخيراً الفن ما الذى يمكن فيه وما الذى لا يمكن وايه حدوده ؟؟ كل ذلك يحتاج الى استخلاص المبادئ من أحكام الشريعة

الحلقتين دول كانوا محاولة فقط لتوضيح معالم " الفكر الاسلامى " وازاى بيستنبط لان الكلام كتر أوى وملوش قواعد محددة.. لكن بعد ما قرأت فيه حاولت استنباط قواعده بصورة تشمل كل ما كتب فيه من الأفكار الصحيحة .. ونذكر ان من أفضل من كتبوا فى هذا الفن الشيخ الغزالى والشيخ القرضاوى والاستاذين سيد قطب ومحمد قطب والأستاذ حسن البنا والشيخ أبوزهرة والرئيس على عزت بيجوفيتش.. وغيرهم