التوبة والاخلاص

التوبة والاخلاص 

التوبة باختصار هى الرجوع الى حمى الله - تعالى - بعد الخروج منه بالذنب ، الحرب مستمرة لاخر نفس والأعداء أقوياء واعمالهم مغرية جداً وغرضهم ابعادك عن حصن الطاعة باى ثمن .. ويريد الله - سبحانه - منك أن تبقى داخل الحصن ، ومهمتك انك تجاهد الأعداء وتفضل مكانك ..


حاول توصل الى نقطة معينة من الأعمال الثابتة بحيث تعرف تقيم نفسك لما تتوب لو لقيت نفسك رجعت لنفس الخط القديم تبقى رجعت للحصن وربنا تاب عليك لو لسه مضطرب تبقى لسه بره

التوبة مش مجرد الندم .. التوبة زى ما قلنا دخول الحصن و الرجوع للخط القديم ، ومش هتقدر تدخل الحصن طول ما انت ظالم حد لانه حصن الملك العادل - عزوجل - فقبل ما تطلب العودة الى الداخل رد كل المظالم
مفهومك عن الحرب لازم يتغير .. مينفعش تغلط وتفضل بره بحجة انك غلط كتير لان وجودك خارج حدود الحصن معناه هلاكك فى جحيم جهنم

أسلحة أعدائك : الشيطان دماغه مش حلوة أوى ، يعنى همه الاساسى يلبسك فى اى مصيبة والسلام ، واحدة معدية ماشى ، غيبة ونميمة ميضرش المهم تطلعله بره عشان يظبطلك بقيت المعاصى الاكبر .. أما النفس فعصية جداً وطفلة جداً بتزن على دماغك على حاجة واحدة معينة موجودة خارج الحصن وكل ما تنسى تفكرك بيها وهو دا سبب الذنب المتكرر

الاسلحة اللى هتبعدك عن كثرة المعصية هى انك تكسب أرض جديدة جوا الحصن يعنى تقرب أكتر من الملك وكل ما كنت أقرب كل ما كانت مهمة الأعداء لاخراجك أصعب .. والوسيلة الوحيدة لذلك هى انك تخطط انك كل فترة معينة تكسب عادة " عبادة ثابتة " جديدة يعنى مرة تنتظم فى الأذكار ومرة تنتظم فى القرآن وكل حاجة تديها وقتها لحد ما تستوى خالص وتبقى ثابتة فى حياتك
أعمال الحصن مكشوفة للملك ومخفية عن الناس ولها اتجاهين اتجاه للداخل ناحية الملك واتجاه للخارج ناحية الناس ، والمطلوب تقدم اعمالك للملك فقط وخد بالك لو قدمت عملك للناس هتكون بتخرج قرب الباب لان الناس اغلبهم هناك وانت متوجه لهم ، انما لو قدمت عملك للملك هتقرب جداً من الداخل لانك متوجه للملك وهيقرب الناس منك لانهم كمان متقربين تجاه الملك .. ولو مبتعملش حاجة عشان خايف من الرياء هتفضل بردوا قرب الباب وهتكون غصب عنك بتعمل كدا " انك متعملش يعنى" عشان الناس  أما سبيل القرب الوحيد من الداخل هو التوجه الى الملك بالعمل وهو دا الاخلاص

التشبيهات اللى فوق دى واردة فى حديث النعمان بن بشير " الحلال بين والحرم بين" ولله المثل الأعلى
خلاصة الكلام : خليك جوا .. تقدم متفضلش ثابت .. تقدم ببطئ عشان تعمل عادات .. توجه بعملك للملك فقط .. لو حصل وطلعت برا .. ارجع تانى بس افتكر ان الحصن دا لاهل العدل فقط مينفعش تدخله ظالم